Шийдвэрийн дэлгэрэнгүй

Шийдвэрийн төрөл Шийдвэр
Oгноо 2015-03-03
Дугаар 1436
Хэргийн индекс 102/2015/00939/И
Шүүх Дүүргийн Иргэний хэргийн анхан шатны 2 дугаар шүүх
Шүүгч Адъяахүүгийн Сарантуяа
Нэхэмжлэгч Ч.Чулуунцэцэг
Хариуцагч
Гуравдагч этгээд
Маргааны төрөл Ажилласан жил тогтоолгох
Хүчинтэй эсэх Тийм
Шийдвэрийн товч

 

 

 

2015 оны 3 сарын 03 өдөр

Дугаар 102/ШШ2015/01436

Улаанбаатар хот

 

 

 

МОНГОЛ УЛСЫН НЭРИЙН ӨМНӨӨС

 

Дүүргийн иргэний хэргийн анхан шатны хоёрдугаар шүүхийн шүүгч А.Сарантуяа даргалж, тус шүүхийн танхимд хийсэн шүүх хуралдаанаар, Сонгинохайрхан дүүргийн 8 дугаар хороо, Нуурын 10 дугаар гудамжны 9 тоотод оршин суух, Боржигон овогт Чилхаагийн Чулуунцэцэг /РД: ЙЕ62021608/-ийн ажиллаж байсан байдал болон бичиг баримтын жинхэнэ эзэмшигч мөн болохыг тогтоолгох тухай хүсэлттэй иргэний хэргийг нээлттэй хянан хэлэлцэв.

Шүүх хуралдаанд: хүсэлт гаргагч Ч.Чулуунцэцэг, шүүх хуралдааны нарийн бичгийн дарга Э.Энхмаа нар оролцов.

ТОДОРХОЙЛОХ нь:

 

Хүсэлт гаргагч Ч.Чулуунцэцэг шүүхэд гаргасан хүсэлт болон шүүх хуралдаанд өгсөн тайлбартаа:

Ч.Чулуунцэцэг би 1962 оны 2 дугаар сарын 16-ны өдөр Өвөрхангай аймгийн Бүрд суманд төрсөн. Би 1982 онд ЗХУ-д суралцаж оёдолчин мэргэжил эзэмшиж Улаанбаатар хотын Сүлжмэлийн 2 дугаар үйлдвэрт оёдолчноор ажилд орсон. Уг үйлдвэрт ажиллаж байгаад 1984 оны 12 дугаар сарын 28-нд ажлаас чөлөөлөгдөж, 1985 оны 1 дүгээр сарын 21-ний өдрөөс эхлэн Өвөрхангай аймгийн Бүрд сумын Улаантуг нэгдэлд талхчнаар ажилд орсон. Ингээд 1992 оны 12 дугаар сарын 30-ны өдрийг хүртэл ажилласан юм. Миний өндөр насны тэтгэвэр тогтоолгох нас болсон бөгөөд Улаантуг нэгдэлд талхчнаар ажиллаж байсан тухай баримт архиваас олдохгүй байх тул энэ хугацаанд ажиллаж байснаа тогтоолгох, мөн хөдөлмөрийн дэвтэрт овгийг маань Чалхаа овогтой Чулуунцэцэг гэж буруу бичсэн байх тул уг хөдөлмөрийн дэвтрийн жинхэнэ эзэмшигч нь Чилхаа овогтой Чулуунцэцэг миний бие мөн болохыг тогтоож өгнө үү гэв.                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                  

 

Хэрэгт авагдсан болон шүүх хуралдаанаар хэлэлцэгдсэн бичгийн нотлох баримтуудыг шинжлэн судлаад

      ҮНДЭСЛЭХ нь:

 

Хүсэлт гаргагч Ч.Чулуунцэцэгийн хүсэлтийг хангаж шийдвэрлэх нь зүйтэй байна.

Чилхаа овогтой Чулуунцэцэг нь түүний 1983 оны 2 дугаар сарын 20-ны өдрийн хөдөлмөрийн дэвтэрт “Чалхаа овогтой Чулуунцэцэг” гэж бичигдсэн нь түүний иргэний үнэмлэхэнд бичигдсэн “Чалхаа овогтой Чулуунцэцэг” гэх нэртэй тохирохгүй байгаа учир эрх олгосон бичиг баримтын жинхэнэ эзэмшигч мөн болохоо тогтоолгон, Өвөрхангай аймгийн Бүрд сумын Улаантуг нэгдэлд 1985 оны 1 дүгээр сарын 21-ний өдрөөс 1992 оны 12 дугаар сарын 30-ны өдрийн хооронд талхчнаар ажиллаж байсан болохыг тогтоолгохоор шүүхэд хүсэлт гаргажээ.

Ч.Чулуунцэцэгийн 1983 оны 2 дугаар сарын 20-ны өдрийн хөдөлмөрийн дэвтэрт “Чалхаа овогтой Саранцэцэг” гэж бичигдсэн бөгөөд хүсэлт гаргагч Чилхаа овогтой Чулуунцэцэгийн төрсөн он, ажиллаж байсан газартай тохирч байгаа зэргээс түүний овог нэрийг буруу бичсэн болохыг шүүх хуралдаанд мэдүүлсэн Ч.Чулуунцэцэгийн өөрийн тайлбар, түүний ЙЕ62021608 регистрийн дугаартай иргэний үнэмлэхний хуулбар /хэргийн 3 дугаар тал/ зэргээр нотлогдож байна гэж үзэн, Чилхаа овогтой Чулуунцэцэг нь №025164 дугаартай хөдөлмөрийн дэвтрийн жинхэнэ эзэмшигч мөн болохыг тогтоох нь зүйтэй гэж үзэв.

Харин Чилхаа овогтой Чулуунцэцэгийг ажилд томилсон тухай тушаал байхгүй, хөдөлмөрийн дэвтэрт Улаантуг нэгдэлд талхчнаар ажилд томилсон хугацааг 1988 он гэж бичсэн /хэргийн 7 дугаар тал/ боловч шүүхэд тодорхойлолт гаргасан Б.Батсуурь, Ц.Эрдэнэбилэг нарын мэдүүлэг /хавтаст хэргийн 21, 22 дугаар тал/, 1985 оноос 1991 оныг дуустал Улаантуг нэгдэлд ажиллаж байхдаа цалин авч байсан тухай Өвөрхангай аймгийн архивын тасгийн лавлагаа /хэргийн 4 дүгээр тал/, Өвөрхангай аймгийн Бүрд сумын засаг даргын 2013 оны 5 дугаар сарын 16-ны өдрийн 3/69 тоот тодорхойлолт /хэргийн 5 дугаар тал/, Бүрд сумын 4 дүгээр багийн засаг даргын 2013 оны 5 дугаар сарын 16-ны өдрийн 27 тоот тодорхойлолт /хэргийн 6 дугаар тал/, 1992 онд олгосон тэтгэмжтэй чөлөөний жагсаалтаар талхчин  Ч.Чулуунцэцэгт жирэмсний тэтгэмжтэй чөлөө олгосон /хэргийн 8 дугаар тал/, Хүүхэд асрах тэтгэмжтэй чөлөө олгох тухай тушаал /хэргийн 9 дүгээр тал/, Ажлаас чөлөөлөх тухай 1992 оны 12 дугаар сарын 30-ны өдрийн Өвөрхангай аймгийн Бүрд сумын Батхаан хэрэглээний хоршооны ерөнхий хорооны тэргүүлэгчдийн тушаал /хэргийн 10 дугаар тал/ зэрэг нотлох баримтуудаар тогтоогдож байх тул Ч.Чулуунцэцэгийг 1985 оны 1 дүгээр сарын 21-ний өдрөөс 1992 оны 12 дугаар сарын 30-ны өдрийг хүртэлх хугацаанд Өвөрхангай аймгийн Бүрд сумын Улаантуг нэгдэлд талхчнаар ажиллаж байсан гэж дүгнэх нь зүйтэй байна.

 

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.1, 115.2.1, 116 дугаар зүйлд заасныг тус тус удирдлага болгон

         ТОГТООХ нь:

 

1. Иргэний хэрэг шүүхэд хянан шийдвэрлэх тухай хуулийн 135 дугаар зүйлийн 135.2.4 дэх хэсэгт заасныг баримтлан, Боржигон овогт Чилхаагийн Чулуунцэцэгийг /РД: ЙЕ62021608/-г 1983 оны 2 дугаар сарын 20-ны өдрийн 025164 дугаар хөдөлмөрийн дэвтрийн жинхэнэ эзэмшигч мөн болохыг тогтоосугай.

 

2. Иргэний хэрэг шүүхэд хянан шийдвэрлэх тухай хуулийн 135 дугаар зүйлийн 135.2.6 дахь хэсэгт заасныг баримтлан Боржигон овогт Чилхаагийн Чулуунцэцэгийг Өвөрхангай аймгийн Бүрд сумын Улаантуг нэгдэлд 1985 оны 1 дүгээр сарын 21-ний өдрөөс 1992 оны 12 дугаар сарын 30-ны өдрийг хүртэлх хугацаанд талхчнаар ажиллаж байсан болохыг тогтоосугай.

 

3. Монгол улсын Тэмдэгтийн хураамжийн тухай хуулийн 7 дугаар зүйлийн 7.1.1, Иргэний хэрэг шүүхэд хянан шийдвэрлэх тухай хуулийн 57 дугаар зүйлийн 57.1 дэх хэсэгт заасныг баримтлан хүсэлт гаргагч Ч.Чулуунцэцэгийн улсын тэмдэгтийн хураамжид урьдчилан төлсөн 70.200 төгрөгийг төсвийн орлогод хэвээр үлдээсүгэй.

 

4. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2 дахь хэсэгт зааснаар шийдвэр танилцуулан сонсгомогц хүчинтэй болохыг заасугай.

 

5. Иргэний хэрэг шүүхэд хянан шийдвэрлэх тухай хуулийн 120 дугаар зүйлийн 120.2 дахь хэсэгт зааснаар зохигч анхан шатны шүүхийн шийдвэрийг гардан авснаас хойш 14 хоногийн дотор Иргэний хэргийн давж заалдах шатны 10 дугаар шүүхэд давж заалдах гомдол гаргах эрхтэйг дурьдсугай.

 

 

 

 

 

ДАРГАЛАГЧ, ШҮҮГЧ                                 А.САРАНТУЯА



 

 

 

 

 

Шийдвэр бүрэн эхээрээ
Шийдвэрийг бүрэн эхээр нь үзэхийн тулд манай сайтад нэвтэрсэн байх шаардлагaтай.
Ta энд дарж нэвтэрнэ үү.

Энэ хэргийн бусад шийдвэрүүд

Өөр шийдвэр байхгүй байна.